Духовная грамота Ивана Калиты. 1339 год.

Иван I Данилович

Во имя Отця и Сына и Святаго Духа, се яз, грешныи худыи раб Божии Иван, пишу душевную грамоту, ида във Орду, никимь не нужен, целымь своимь оумомь, в своемь здоровьи. Аже бог что розгадаеть о моемь животе, даю ряд сыном своим и княгини своеи.

1. Приказываю сыном своим очину свою Москву. А се есмь им роздел оучинил. 

2. Се дал есмь сыну своему бо[лше]му Семену: Можаеск со всими волостьми, Коломну со всими Колом[ен]скими волостьми, Городенку, Мезыню, Песочну, и Середокоротну, Похряне, Оусть-Мерьску, Брошевую, Гвоздну, Ивани, Деревни, Маковець, Левичин, Скулнев, Канев, Гжелю, Горетову, Горки, село Лысцевьское, село на Северьсце в Похряньском оуезде, село Костянтиновское, село Орининьское, село Островьское, село Копотеньское, селце Микульское, село Малаховьское, село Напрудьское оу города. 

3. А при своемь животе дал есмь сыну своему Семену: 4 чепи золоты, 3 поясы золоты, 2 чаши золоты с женчюги, блюдце золото с женчюгомь с каменьем, 2 чума золота болшая. А ис судов ис серебрьных дал есмь ему 3 блюда серьбрьна.

4. А се даю сыну своему Ивану: Звенигород, Кремичну, Рузу, Фоминьское, Суходол, Великую свободу, Замошьскую свoбоду, Оугожь, Ростовци, Окатьеву свободку, Скирминовьское, Тростну, Негучю. А села: село Рюховьское, село Каменичское, село Рузьское, село Белжиньское, село Максимовское, село Андреевское, село Вяземьское, с[ело До]монтовское, село в Замошьскои свободе, село Семциньское.

5. А из золота дал есмь сыну своему Ивану: 4 чепи золоты, пояс золот болшии с женчюгомь с каменьемь, погас золот с капторгами, пояс сердоничен, золотомь окован, 2 овкача золота, 2 чаш[к]и круглыи золоты, блюдо серебрьно Ездниньское, 2 блюдци меншии.

6. А се дал есмь сыну своему Андрею: Лопастну, Северьску, Наруниж[ское, Серпо]хов, Нивну, Темну, Голичичи, Щитов, Перемышль, Растовець, Тухачев. А се села: село Талежьское, село Серпоховьское, село Колбасиньское, село Нарьское, село Перемышльское, село Битяговьское, село Труфоновьское, село Ясиновьское, село Коломнинское, село Ногатиньское.

7. А из золота дал есмь сыну своему Андрею: 4 чепи золоты, пояс золот фрязьскии с женчюгомь с каменьемь, пояс золот с крюкомь на чьрвьчать шелку, пояс золот цесаревьскии, 2 чары золоты, 2 чумка золота меншая; а из блюд, – блюдо серебрьно, а два малая.

8. А се даю княгини своеи с меншими детми: Сурожик, Мушкову гору, Радонежьское, Бели, Воря, Черноголовль, на Вори свободка Софроновьская, Вохна, Деиково раменье, Данилищова свободка, Машев, Селна, Гуслиця, Раменье, что было за княгинею. А села: село Михаиловьское, село Луциньское, село оу озера, село Радонежьское, село Деигуниньское, село Тыловское, Рогожь, село Протасьевское, село Аристовское, село Лопастеньское, село Михаиловское на Яоузе, 2 селе Коломеньскии. 

9. А из городских волостии даю княгини своеи осмничее.  

10. А тамгою и иными волостми городскими поделяться сынове мои. 

11. Тако же и мыты, которыи в которого оуезде, то тому.

12. А оброкомь медовымь городскимь Василцева веданья поделяться сынове мои. 

13. А что моих бортников и оброчников купленых, которыи в которого росписи, то того.

14. А по моим грехом, ци имуть искати татарове которых волостии, а отыимуться, вам, сыном моим, и княгини моеи поделити вы ся опять тыми волостми на то место.

15. А числьныи люди ведають сынове мои собча, а блюдуть вси с одиного. 

16. А что мои люди куплении в великом свертце, а тыми ся поделять сынове мои 

17. А что золото княгини моее Оленино, а то есмь дал дчери своеи Фетиньи, 14 обручи и ожерелье матери ее. Монисто новое, что есмь сковал, а чело и гривну, то есмь дал при сoбе. 

18. А что есмь придобыл золота, что ми дал бог, и коробочку золотую, а то есмь дал княгини своеи с меншими детми. 

19. А ис порт из моих сыну моему Семену: кожух черленыи женчужныи, шапка золотая. 

20. А Ивану, сыну моему: кожух желтая обирь с жьнчугомь, коць великии с бармами. 

21. Андрею, сыну моему: бугаи соболии с наплечки с великимь женчюгомь с каменьем, скорлатное портище с бармами. 

22. А что есмь нынеча нарядил 2 кожуха с аламы с женчюгомь, а то есмь дал меншим детем своим, Марьи же Федосьи, ожерельем. 

23. А что моих поясов серебрьных, а то роздадять по пискупьям.

24. А что мое 100 руб. у Ески, а то роздадять по церквам. 

25. А что ся остало из моих судов из серебрьных, а тым поделяться сынове мои и княгини моя. 

26. А что ся останеть моих порт, а то роздадять по всим пискупьям и на Москве. 

27. А блюдо великое о 4 колця, а то даю святеи Богородици Володимерскои. 

28. А что есмь дал сыну своему Семену стадце, а другое Ивану, а иными стады моими поделятся сынове мои и княгини моя. 

29. А прочь Московьских сел, даю сыну своему Семену села своя купленая: село Аваковское в Новегороде на Оулале, другое в Володимери Борисовское. 

30. А что есмь купил село Петровское, и Олексиньское, Вседобричь, и Павловьское на Масе, половину есмь купил, а половину есмь сменил с митрополитом [лакуна в 10-11 букв] а селця на Масе, что есмь купил у Афинея, то даю сыну своему Ивану. 

31. А что есмь купил село Варварьское и Поеловьское оу Юрьева, что есмь сменил на Матфеищовьское село, то даю сыну своему Андрею. 

32. А что село Павловское, бабы нашее купля, и Новое селце, что есмь купил, и Олександр святыи, что есмь купил на Костроме, то даю княгини своеи. 

33. А что есмь купил село в Ростове Богородичское, а дал есмь Бориску Воръкову, аже иметь сыну моему которому служити, село будет за нимь, не иметь ли служити детем моим, село отоимут. 

34. А что есмь прикупил селце на Кержачи оу Прокопья у игумна, другое Леонтиевское, третье Шараповское, а то даю святому Олександру собе в поминанье. 

35. А приказываю тобе, сыну своему Семену, братью твою молодшую и княгиню свою с меншими детми, по бозе ты им будешь печалник. 

А кто [сю] грамоту порушит, судить ему Бог. 

А на се послуси: отець мои душевныи Еф[ре]м, отець мои душевныи Федосии, o[тець мои] душевныи, поп Давыд.