Устав Ярослава Владимировича о церковных судах.

Се яз Князь Великий Ярослав, сын Володимерь, по данью отца своего сгадал есми с митрополитом с Ларионом, сложил если со Греческим номоканоном, аже не подобаеть сих тяжь судити князю и бояром. Дал есмь митрополитом и епископом те суды, что писаны в правилех, в номоканоне, по всем городом и по всей области, где крестьянство есть.
1. Аже кто умчить девку или насилить, аже боярская дчи, за сором ей 5 гривен золота, а епископу 5 гривен золота; а меньших бояр гривна золота, а епископу гривна золота. Добрых людей за сором 5 гривен серебра, а на умычницех по гривне серебра епископу, а князь казнит .
2. Аже кто пошибаеть боярскую дщерь или боярскую жену, за сором ей 5 гривен золота, а епископу 5 гривен золота; а менших бояр гривна золота, а епископу гривна золота; а нарочитых людей 3 рубли , а епископу 3 рубли; а простой чади 15 гривен, а епископу 15 гривены, и князь казнит.
3. Аже пустить боярин велик жену без вины, за сорок ей 5 гривен золота, а епископу 5 гривен золота; а нарочитых людей 3 рубли, а епископу 3 рубли; а простой чади 15 гривен, а епископу 15 гривен, а князь казнит.
4. Аже у отца и у матери дщи девкою дитяти добудеть обличив ю, поняти в дом церковный, а чим ю род окупить .
5. Аже девку умолвить кто к себе и дасть в толоку, на умольнице епископу 3 гривны серебра, а девице за сором 3 гривны серебра, а на толочных по рублю, а князь казнит.
6. Аже муж от жены блядеть, епископу в вине, а князь казнит.
7. Аже муж оженится иною женою, со старою не распустився, муж епископу в вине, а молоду в дом церковный, а с старою жити .
8. Аже жене лихий недуг болить, или слепота, или долгая болезнь, про то ее не пустити; такоже и жене не лзе пустити мужа .
9. Аже кум с кумою створить блуд, епископу гривна золота, и в епитимьи.
10. Аже кто зажжет двор, или гумно, или что иное, епископу 100 гривен, а князь казнит.
11. Аже кто с сестрою согрешит, епископу 100 гривен, а в епитимьи и в казни по закону.
12. Аже ближний род поймется, епископу 80 гривен, а их разлучить, а епитимью да примуть.
13. Аже две жены кто водит, епископу 40 гривен, а которая подлегла, та поняти в дом церковный, а первую держати по закону; а иметь лихо водити ю , казнью казнить его.
14. Аже муж с женою по своей воли распуститься, епископу 12 гривен; а буде не венчался, епископу 6 гривен .
15. Аже кто сблудить с черницею, епископу сто гривен.
16. А с животною 12 гривен, а в епитимью вложить.
17. Аже свекор с снохою сблудить, епископу 100 гривен, а епитимья по закону.
18. Аже кто с двемя сестрами падется, епископу 30 гривен.
19. Аже кто с мачихою сблудит, епископу 40 гривен.
20. Аже два брата будуть со единою женою, епископу 100 гривен, а женка в дом церковный.
21. Аже девка не всхощеть за-муж, а отец и мати силою дадуть, а что створить над собою, отец и мати епископу в вине, а истор им платити, тако же и отрок .
22. Аже кто зоветь чюжу жену блядью великих бояр, за сором ей 5 гривен золота, а епископу 5 гривен золота, а князь казнит. А будеть меньших бояр, за сором ей 3 гривны золота, а епископу 3 гривны золота. А будеть городских людей, за сором 3 гривны серебра. А сельских людей за сором гривна серебра, а епископу гривна серебра.
23. Аже пострижет голову или бороду, епископу 12 гривен, а князь казнит.
24. Аже муж имет красти коноплю или лен и всякое жито, епископу в вине со князем на-полы; такоже и женка, иже иметь красти .
25. Аже муж крадет белые порты, или полотна, портищи, и поневы, такоже и женка, епископу в вине с князем на-полы.
26. Свадебное и сговорное бой, убийство и душегубство, аже что чинится, платять виру князю на-полы со владыкою .
27. Аже мужа два бьетъся, один другаго укусить или одереть, епископу 3 гривны.
28. Аже муж бьет чужю жену, за сором ей по закону, а епископу 6 гривен.
29. Аже сын бьет отца или матерь, да казнят его волостельскою казнию, а епископу в вине .
30. Аже чернець, или черница, или поп, или попадья, или проскурница впадуть в блуд, тех судити епископу оприснь мирян, и во что их осудить, волен.
31. Аже поп или чернец упьются без времени, епископу в вине.
32. Аже чернец или черница разстрижется, епископу в вине, во что их обрядить.
33. А что деется в домовных людех и в церковных и в монастырех, а не вступаються княжи волостели в то, а то ведают епископли волостели и безатщина их епископу идет .
А кто уставление мое порушить или сынове мои, или внуцы мои, или правнуцы мои, или от рода моего кто, или от бояр, а порушить ряд мой и вступится в суды митрополичи, что есми дал митрополиту и епископом по всем городом, по правилом святых отец, судивще казнити по закону; а кто иметься в те суды церковные вступати, крестьянско имя не наречеться на том, а от святых да будет проклят.